Nunatsinni Perorsaasut Kattuffiata NPK-p Feriefond-iata Siulersuisuisa aalajangerpaat, Januar 2025-mi atuutilersumik sulinngiffeqarluni angalanerni tapiissutit akilerneqartartut annikillineqassasut, tapiissutit 75%-inngorlugit.
Aalajangiinerup tunuliaqutaa
Aalajangiineq pivoq Aningaasaateqarfiup aningaasaqarnerata eqqarsaatigineqarnissaa pissutigalugu, ukiuni pingasuni kingullerni pingaartumik Covid-19-ip kingunerisaanik Air Greenlandillu angalanernut akigititaasa qaffannerisa kingunerisaannik, Aningaasaateqarfiup aningaasaatai annikillerujussuarsimammata. Taamaattumik Aningaasaateqarfiup Siulersuisuisa, aningaasaateqarfiup ingerlaannarnissaa qulakkeerniarlugu periarfissat misissortariaqarsimavaat, tamatumalu kinguneraa siunissami sulinngiffeqarluni angalanerit tamakkiisumik tapiiffigineqarsinnaajunnaarmata. Malugeqquarput Aningaasaateqarfiup Siulersuisuisa tapiissutit ikilisarnissaat maannamut tunuarsimaarfigisimammassuk, naatsorsuutigineqarsimagaluarmammi mittarfiit nutaat kingunerissagaat bilitsit akiisa malunnaatilimmik apparnissaat, tamannali naatsorsuutigineeeruppoq.
Aningaasaateqarfiup malittarisassai
Sulinngiffeqarluni angalanernut Aningaasaateqarfiup malittarisassaani § 2 naapertorlugu Aningaasaateqarfiup siunertaraa Naalakkersuisut aamma Nunatsinni Perorsaasut Kattuffiata isumaqatigiissutaannik atuisut sulinngiffeqarnerminni angalanissamut tapiiffigineqartarnissaat.
Aningaasaateqarfik aningaasalersorneqarpoq NPK-p Naalakkersuisullu akornanni isumaqatigiissut malillugu sulisitsisut sulisorisamik tapiiffigineqarsinnaanissaannut qaammatikkaartumik akilersuinerisigut. Aningaasaateqarfiup malittarisassai maanna nutarterneqartut Namminersorlutik Oqartussanit tiguneqariarpata nittartakkamut ilineqarumaarput.
Angalanissamut inniminniisarneq
Pisarnertut sulinngiffeqarluni angalanissamut qinnuteqaat Aningaasaateqarfiup allaffianut feriefonden@npk.gl -mut nassiunneqassaaq, sulisitsisumit atorfininnermut allagartaq aamma najukkamut uppernarsaat ilanngullugu. Aningaasaateqarfiup angalanermut tapiissutissaata annertussissaanut aalajangiisuusarpoq qinnuteqartup sumi najugaqarnera aammalu Air Greenlandip najugaqarfigisamit Københavnimut siumut utimullu billetsimut akigititai, Aningaasaateqarfiullu malittarisassai malillugit angalanissamik taamaatitsiinnarnissamut sillimmasiissut aamma allaffissornermut aningaasanik atuinermut akiliut ilannguppata akit nalinginnaasut nalingisa 75%-ii tapiissutigineqassallutik.
Piffissaagallartillugu inniminniinissaq
Aningaasaateqarfiup kaammattuutigaa sulinngiffeqarluni angalanissamut piffissaagallartillugu inniminniisoqartarnissaa – angalanissaq qaammatinik pingasunik sioqqullugu.
Nalorniguit attavissaq
Qulaani allassimasunut apeqqutissaqaruit Aningaasaateqarfik mail-ikkut attavigiuk uunga feriefonden@npk.gl .
NPK, Februar 2025