NPK-p Malittarisassai – § 3 Kattuffiup ilaasortai:
Imm. 6 Ilaasortat akiliisartut tamarmik qaammatini 6-ni ilaasortaareernermikkut tamakkiisumik piginnaatitaaffeqarput. Imm. 7 NPK-p nittartagaani www.npk.gl -mi immersugassaq immersorlugu ilaasortanngortoqartassaaq. Immersugassaq nittartakkamiittoq atorlugu aamma ilaasortaajunnaarniarneq qaammat ataaseq sioqqullugu nalunaarutigineqartassaaq. Ilaasortaanermut akiliut qaammammut 480,- kruuniusoq NPK-p ataatsimeersuarnerani annertussusilerneqartarpoq.
Ilaasortat akiliutaat sumut atorneqartarpat?
NPK-p susassaqarfiini tamani Ataatsimeersuarneq qullersatut oqartussaassuseqarpoq, taamaalilluni NPK-mut tunngasut pingaarutillit tamarmik ataatsimeersuarnermi aalajangerneqartarlutik. Ataatsimeersuarneq ukiut pingasukkaarlugit ingerlanneqartarpoq, tassani Siulersuisuunerni siulittaasoq, siulittaasup tullia, aningaaserisoq, ilaasortat 4-mat sinniisussallu 3-sut qinerneqartarlutik, taakkuuppullu ataatsimeersuarnerit akornanni qullersatut oqartussaassuseqartut. Ataatsimeersuarnermi ilaatigut siunissami suliassat suut pingaartillugit anguniarneqassasut, ukiumut aningaasat atugassat aammalu ilaasortat akiliutaasa annertussusissaat aalajangersarneqartarput.
Taamaattumik suliassat suut pingaarnerutillugit Kattuffimmit suliarineqassanersut ataatsimeersuarnermi aalajangiiffigineqartarput. Ilaasortat akiliutaannit isertitat ilaatigut inissiamik allaffittut atugassamik pisinermut, allaffimmi pisattat atortussallu tamaasa, allaffimmi sulisunut, inatsisilerituumut immikkut suliaqartitsisarnermut, siulersuisut ataatsimiittarnerinut, sulianut tunngasunut angalanernut, perorsaasut sulinerminni atugaannik misissuisitsinermut, perorsaasut akissaatai pillugit isumaqatiginninniarnermut tungasuni suliaqartarnermut allarpassuarnullu atorneqartarput. Ataatsimut isigalugu ilaasortat sulinerminni atugaasa aningaasarsiaasalu pitsanngorsarnissaat anguniarlugu NPK-mit ataavartumik suliarineqartarput.
PBS, Betalingsservice aqqutigalugu ilaasortaanermut akiliutitit qaammatikkaartumik akilersorsinnaavatit. EQQAAMALLUGU: NPK-mut ilaasortaanermut akiliutitit akileraaruteqaataasussanit ilanngaatigine-qarsinnaammata.
Sulinngiffeqarluni angalanissamut Aningaasaateqarfik:
Ukiut marluk sinnerlugit ilaasortaasimaguit Danmarkimut imaluunniit Nunatta iluani sulinngiffeqarlutit angalanissamut billet-inut Sulinngiffeqarluni angalanissamut Aningaasaateqarfimmit tapiiffigineqarsinnaavutit. Air Greenland-ip angalanermi akinik qaffaanerata kingunerisaanik Aningaasaateqarfiup Siulersuisui aalajangertariaqarsimapput 1. Januar 2025 atuutilersumik angalanernut tapiissutit annikillineqassasut.
Maannamiit sulinngiffeqarluni angalanissamut Aningaasaateqarfimmit Air Greenland-ip najugaqarfimmiit København-imut nalinginnaasumik akikinnerpaamik fleksibel billet-it akiisa 75%-iinik annertussusillit tapiissutigineqarsinnaalerput. EQQAAMALLUGU suliffigisamit atorfininnermut allagartaq aamma najugaqarnermut uppernarsaat (pdf-nngorlugit) suli pinngitsoorani feriefonden@npk.gl -mut nassiunneqartassammata. Paasissutissat annertunerusut nittartakkami Sulinngiffeqarluni angalanissamut Aningaasaateqarfiup ataani Angalatitsivimmut angalanissamut inniminniinissat qanoq iliorluni ingerlassanersoq takusinnaavat.
Ilaasortat aningaasanik atorniarsinnaanerat:
Ilaasortat Tjenestemændenes Låneforening-mit atorniarnissaminnut periarfissaqarput. Piumasaqaatit mak-kuupput:
- Tjenestemændenes Låneforening-imit attartorniaraanni ukioq ataaseq NPK-mi ilaasortaareer-simasariaqarpoq.
- Ilaasortap suliffigisaata aamma Tjenestemændenes Låneforening-ip akornanni, attartukkat attartortup akissarsiaanit ilanngaanneqartarnissaannik isumaqatigiissuteqarsimanissaa piumasa-qaataavoq. Suliffeqarfik akissarsianit ilanngaassisarnissamik isumaqatigiissuteqarsimanngippat atorniartoqarsinnaanngilaq.
- Qinnuteqaat Tjenestemændenes Låneforening-ip kisimi suliarisinnaavaa.
- Qinnuteqaasiornermi qallunaatut oqaatsit kisimik atorneqarput.
Ilaasortanik sullissineq:
Ullut tamaasa oqarasuaatikkut e-mail-ikkullu info@npk.gl saaffiginissutit takkussuuttarput. Saaffiginnissutit assigiinngiiaarput, soorlu aningaasarsianut tunngatillugu perorsaasunut tapit annertussusaat skala-nullu tunngasut aamma perorsaasunit allanillu saaffiginnissutit imaannaannginnerusut soorlu soraarsitaanissamut tunngasut, piaartumik ikioqqusut imaluunniit siunnersoqqullutik ilitsersoqqullutilluunniit saaffiginnissutit. NPK allaffeqarfeqarpoq ulapaarfiusumik, tassaniippullu aalaakkaasumik sulisut pingasut: Suliitigaluni siulittaasoq, NPK-p Sulinngiffeqarluni angalanernut Aningaasaateqarfiata ataani sulisut sulinngiffeqarlutik angalanissaannik isumaginnilluni suliaqartuusoq kiisalu pingaartumik ilaasortanut tunngasunik allanillu suliaqartuusoq.
Ilaasortanit saaffiginnissutit:
Ilaasortat amerlanertigut aningaasarsianut, tapinut, qanoq sivisutigisumik sulisimanermut, eqqortumik aningaasarsiaqartinneqarnerlutik imaluunniit suliffimmi sulinermi atukkat pitsaanngitsut pillugit saaffiginnittarput. Ilaasortat amerlasuut saaffiginninnginnerminni akissaatinut isumaqatigiissutit nammineerlutik qimerloorsimasarpaat, nalornissutitik paasilluarumallugit. Taava sulisitsisuminnit/HR-mit naammaginartumik akissutisinngikkaangamik NPK-mut saaffiginnittarput.
Amerlavallaarpulli ilaasortat nalornissutiminnik sunik tamanik saaffiginnissuteqartartut, apeqqutit akissaatinut isumaqatigiissutit qimerloornerisigut akissutissarsiffiusinnaasut imaluunniit atorfinitsi-taanerminnut tunngammata sulisitsisuminnut saaffiginninnermikkut akineqarsinnaagaluartut.
Ilaasortat amerlasuut NPK-mut saaffiginnittarput sianerlutik aamma e-mail-ikkut, saaffiginnikkaangamillu naatsorsuutigisarpaat ingerlaannaq imaluunniit periarfissaq siulleq atorlugu akineqassallutik. Suliffiit inunnik kiffartuussiffiusut amerlagunanngillat tamatuminnga naammassinnissinnaasut, uffa taakkunani sulisui NPK-mit amerlanerugaluaqisut. Iluaqutaassagaluarpoq ilaasortat namminneerlutik misissueqqaalaartartuuppata.
Ilaasortatsinnut sullisserusoqaagut. Saaffiginnissutit tigugaangatsigit misissoqqaagassaasarput, paaseq-quarpulli suut tamaasa tuaviortumik suliarisinnaaneq ajoratsigit.