Ilaasortanngorneq

Nunatsinni Perorsaasut Kattuffiani, NPK-mi Ilaasortatta akissaatitigut atorfinitsinneqarnerminnilu atugaat pitsanngorsaavigalugit suliaqarpugut. Taamaattumik sulisitsisunik isumaqatiginninniartarnitsigut ilaasortat aningaasarsiatigut, atorfinitsitaanermi sulinermilu atukkatigut soqutigisaat qulakkeerniarlugit suliaqartarpugut.

Meeqqeriviinni, Ulloq unnuarlu Angerlarsimaffinni meeqqanut, inuusuttunut inersimasunullu il.il. sulisuusimaguit, maluginiarsimassavat suliffeqarfiit pineqartut tamarmik perorsaasunik ilinniarsimasunik allanillu perorsaanermik sulialinnik naammattunik peqanngitsut. Akissarsiat atorfinitsitaanermullu tunngasut tamatta soqutigisaraagut peqatigiillutalu unammilligassat aaqqiiviginiartariaqarlutigit. Ilaasortat amerlaneruppata, perorsaasut sulinerminni atugaasa pitsanngorsarnissaannut nukittunerulluta oqariartuuteqartarsinnaavugut. Perorsaasut atugaat pitsannguuteqassappata, ilaasortat tamaasa pisariaqartippagut – aamma illit.

Ilaasortaanermi iluaqutissat:

Aningaasarsianut sulinermilu atukkanut tunngatillugu soqutigisatit isumaqatigiissutit aqqutigalugit suliaraagut, taamaattumillu pissutissaqanngitsumik suliffinnit soraarsitaaguit, sulinermi tapit pisassatit tunniunneqanngippata il.il. ikiorsersinnaavatsigit. Ilaasortaanermut akiliutitit ukiumut isertitanit akileraaruteqaataasussanit ilanngaatigisinnaavatit.