Qeqqata Kommuniata perorsaasunik ilinniarsimasunik 44-nik amigaateqarnermini immikkut iliuuseqartariaqalerneranut Nunatsinni Perorsaasut Kattuffiannit NPK-mit tapersiut
Qeqqata Kommuniani Sisimiuni Maniitsumilu Meeqqerivinni perorsaasunik sulisunillu allanik 77-nik ullumikkut amigaateqarluinnarnertik pissutigalugu Kommunip ajornartorsiut qaangerniarlugu iliuusissanik siunnersuuteqarpoq, ilaatigut meeqqerivinni inimi ataatsimi meeqqat 20-viusussat 14-nut aammalu meeraaqqerivinni meeraaqqat 12-iusussat 10-nut ikilinissaannik kommunalbestyrelsimut suliassanngortitsinermigut.
Nunatsinni Perorsaasut Kattuffiata NPK-p Qeqqata Kommunia nersualaarpaa pissutsit aammalu meeqqat sulisullu illersorniarlugit maanna iliuuseqarfiginialermagit – neriuutiginarporlu kommunit sinnerisa tamanna eqqumaffigalugu iliuuseqarnialernerannik kinguneqarumaartoq. Nunatsinni Perorsaasut Kattuffiata NPK-p nunatsinni perorsaasut sulinerminni atugaannik sinerissami misissuisitsereerluni ilisimareerpaa avammullu saqqummiunnikuullugulu sumiiffinni amerlanerpaani pissutsit qulaanisut ittut aamma atuummata suliffeqarfiillu inuleriffiusut amerlanerpaat sulisoqarniarnikkut erloqinartumik inissisimasut. Misissuisitsinerup paasinarsitippaa perorsaasut assingusunik ilinniagalinnut sanilliullugit akissaatilunnerusut, suliffinni atukkat pitsaajuaannanngitsut, sinerissami suliffinni avinngarusimasuniittuni atorfiit inuttalerniarneri ajornaqisut aammalu atorfininnermi inissaqartitsisannginneq ilaatigut pissutaasut.
Kommuninut allanut eqqumaffigeqqunarpoq Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaanni nr. 62-mi 20. november 2023-meersumi, § 15, imm. 2-mi takuneqarsinnaammat meeqqerivinni inini meeqqanut eqimattat amerlanerpaamik 20-nik meeraaqqerivinnilu amerlanerpaamik 12-nik meerartaqassasut. Assinganik § 23-mi, imm. 1-mi takuneqarsinnaavoq meeqqat eqimattat tamarmik immikkut sulisoqarnikkut amerlassusilerneqarsimassasut ikinnerpaamik perorsaasumik ataatsimik, perorsaanikkut allamik ilinniagalimmik ataatsimik aamma ikiortimik ataatsimik inuttaqassasut. Tassa inatsimmi pissutsinut naleqqussarnissaq periarfissaareerpoq.
NPK-p nalunaarusiaa uani takuneqarsinnaavoq: www.npk.gl – Nalunaarusiaq NPK Maj 2023
Inussiarnersumik inuulluaqqusilluta/Med venlig hilsen
Arnaq Brønlund
Nunatsinni Perorsaasut Kattuffiat / NPK
Siulittaasoq / Formand
Nuukullak 8,kl
Postboks 1122
3900 Nuuk
Mail: arnaq@npk.gl
Oqarasuaat / Telefon 322471